RIM ໂຕ້ ຈອບສ໌ ແລະ ບອກ BlackBerry ບໍ່ຕ້ອງໃສ່ຊອງ ກໍໂທໄດ້ດີ
ລາຍງານຂ່າວລ່າສຸດ RIM ບໍລິສັດຜູ້ຜະລິດສະມາດໂຟນ BlackBerry ກ່າວໂຕ້ແຍ້ງສິ່ງທີ່ຈອບສ໌ບອກວ່າ Antennagate ບໍ່ໄດ້ເກີດຂຶ້ນກັບ iPhone 4 ເທົ່ານັ້ນ ແຕ່ BlackBerry ກໍມີບັນຫານີ້ດ້ວຍ ໂດຍທາງ RIM ເບິງວ່າ Apple ກຳລັງລ້ຽງປະເດັນບັນຫາໃນການອອກແບບເສົາອາກາດຂອງ iPhone 4
“ຄວາມພະຍາຍາມຂອງ Apple ທີ່ຈະດຶງ RIM ເຂົ້າໄປມີສ່ວນກ່ຽວຂ້ອງກັບຄວາມຜິດພາດຂອງຕົວເອງ ເປັນເລື່ອງທີ່ເຮົາຮັບບໍ່ໄດ້” Mike Lazaridis ແລະ Jim Balsille ຊີອີໂອຮ່ວມຂອງ RIM ກ່າວໃນມື້ດຽວກັນ ຫລັງຈາກ Apple ເປີດຖະແຫລງການ” Apple ອ້າງວ່າ ສະມາດໂຟນຂອງ RIM ກໍມີບັນຫາດຽວກັນ ເປັນຄວາມພະຍາຍາມທີ່ຈະບິດປະເດັນຈາກບັນຫາການດີໄຊນ໌ເສົາອາກາດ ທີ່ຜິດພາດຂອງ iPhone 4 ທີ່ເຮັດໃຫ້ Apple ຕົກຢູ່ໃນສະຖານະການທີ່ລຳບາກຢູ່ໃນຂະນະນີ້”
ຕັ້ງແຕ່ວັນທີ 24 ມິຖຸນາ ຊຶ່ງເປັນວັນທີ່ iPhone 4 ວາງຕະຫລາດ ກໍເລີ່ມມີຜູ້ໃຊ້ບາງລາຍແຈ້ງວ່າ ຄວາມແຂງແຮງຂອງສັນຍານຕົກລົງຢ່າງໜ້າປະຫລາດໃຈ ແມ່ນພວກເຂົາຈະຖື iPhone 4 ດ້ວຍວິທີປົກກະຕິທີ່ເຄີຍໃຊ້ງານ ໂດຍອາການດັ່ງກ່າວໄດ້ເຮັດໃຫ້ຄູ່ສາຍທີ່ ສົນທະນາຢູ່ໃນຂະນະນັ້ນຫລຸດໄປເສີຍໆ ຊຶ່ງໃນການຖະແຫລງຂ່າວເມື່ອວັນສຸກທີຜ່ານມາ ຈອບສ໌ ຊີອີໂອຂອງ Apple ໄດ້ກ່າວວ່າ ໃນອຸດສາຫະກຳສະມາດໂຟນຕ່າງປະສົບບັນຫານີ້ຄືກັນ ໂດຍອ້າງເຖິງຊື່ບໍລິສັດ Research in Motion (RIM), Samsung Electronics ແລະ HTC Corp ທັງນີ້ ສື່ມວນຊົນໄດ້ຕັ້ງຂໍ້ສັງເກດວ່າ ຕະຫລອດເວລາ 90 ນາທີ ຈອບສ໌ບໍ່ໄດ້ລະບຸຊັດເຈນວ່າ ບັນຫາເກີດຈາກການອອກແບບເສົາອາກາດຂອງ iPhone 4 ແຖມຍັງກ່າວຫາວ່າ ສື່ພະຍາຍາມທີ່ຈະໃສ່ຮ້າຍບໍລິສັດທີ່ກຳລັງປະສົບຄວາມສຳເລັດອີກດ້ວຍ “ນີ້ ຄືຊີວິດຈິງໃນໂລກສະມາດໂຟນ ບໍ່ມີມືຖືເຄື່ອງໃດທີ່ສົມບູນ ສະມາດໂຟນສ່ວນໃຫຍ່ທີ່ເຮົາທົດສອບກໍມີອາການຢ່າງນີ້” ຈອບສ໌ ກ່າວ
ສຳລັບການໂຕ້ຕອບຕໍ່ຄຳຖະແຫລງຂອງຈອບສ໌ ຊີອີໂອຮ່ວມຂອງ RIM ກ່າວວ່າ ” RIM ຫລີກລ້ຽງການອອກແບບໃນລັກສະນະທີ່ Apple ເຮັດກັບ iPhone 4 ໂດຍພະຍາຍາມໃຊ້ນະວັດຕະກຳການອອກແບບທີ່ລຸດຄວາມສ່ຽງຕໍ່ການສາຍຫລຸດ ໂດຍສະເພາະໃນບໍລິເວນອັບສັນຍານ” ພວກເຂົາຍັງກ່າວຕໍ່ໄປອີກດ້ວຍວ່າ “ປະເດັນ ໜຶ່ງທີ່ເຫັນໄດ້ແຈ້ງເລີຍກໍຄື ລູກຄ້າຂອງ RIM ບໍ່ຈຳເປັນຕ້ອງໃຊ້ຊອງສຳລັບສະມາດໂຟນ BlackBerry ຂອງພວກພວກເຂົາ ເພື່ອໃຫ້ມືຖືຍັງຄົງໃຊ້ງານໄດ້”
ຂໍ້ມູນຈາກ: AppleInsider, arip.co.th