SOULIYO.COM

ເຄື່ອງມື Capture ຫນ້າເວັບສຸດເທບ ສຳລັບ Google Chrome

Souliyo — Sat, 04 Feb 2012 08:54:22 +0000

ສຳລັບຄົນທີ່ມັກໃຊ້ Google Chrome ແລະ ເປັນຄົນທີ່ມັກໃຊ້ Print Screen ຫນ້າເວັບອາດຈະຖືກໃຈເປັນທີ່ສຸດ ໃນສ່ວນເສີມທີ່ເປັນເຄື່ອງມືສຳລັບ Capture ຫລື ບັນທຶກຫນ້າຈໍ (ຫນ້າເວັບ) ແລະ ຊື່ຂອງມັນກໍ່ຄື Awesome Screenshot.

ຂໍ້ດີຂອງ Awesome Screenshot ກໍ່ຄື: ໃຊ້ງານງ່າຍ ແລະ ວ່ອງໄວ. ຈຸດທີ່ຫນ້າສົນໃຈກໍ່ຄື Awesome Screenshot ສາມາດເລືອກບັນທຶກຫນ້າເວັບໄດ້ແບບທັ້ງເວັບ ແລະ ແບບໃນສ່ວນທີ່ສະແດງຜົນໃນຂະນະນັ້ນ; ນອກຈາກນັ້ນແລ້ວ ຫລັງຈາກການບັນທຶກ ໃນ Awesome Screenshot ຍັງມີຫນ້າສຳລັບການແກ້ໄຂ ຫລື ເພີ່ມເຕີມລົງໄປໃນຮູບທີ່ບັນທຶກມາອີກດ້ວຍ ເຊັ່ນ: ໃສ່ລູກສອນ, ວົງມົນ, ເບຼີຮູບ ຫລື ຈຸດທີ່ຕ້ອງການ, ຕັດຕໍ່, ຫຍໍ້ຂະຫນາດ ແລະ ອື່ນໆອີກ.

ສຳລັບການໃຊ້ງານນັ້ນງ່າຍຫລາຍ, ພຽງແຕ່ເຂົ້າໄປດາວໂຫລດ Awesome Screenshot ຈາກ Chrome Web Store ມາຕິດຕັ້ງລົງໄປໃນ Google Chrome ຂອງທ່ານ. ແລ້ວກໍ່ຈະເຫັນຮູບ icon ເປັນຮູບເລນກ້ອງຖ່າຍຮູບຂຶ້ນມາໃນແທບເຄື່ອງມື. ຫລັງຈາກນັ້ນເວລາທີ່ຕ້ອງການໃຊ້ງານກໍ່ພຽງແຕ່ຄິກເຂົ້າໄປທີ່ຮູບ ເລນກ້ອງຖ່າຍຮູບດັງກ່າວ, ແລ້ວກໍ່ເລືອກຕາມນີ້:

- Capture Visible part of page – ບັນທຶກສະເພາະທີ່ສະແດງຜົນ ຫລື ເຮົາເຫັນໃນຕອນນັ້ນ.

- Capture Entire page – ສຳລັບບັນທຶກເອົາຫມົດທັ້ງຫນ້າຕັ້ງແຕ່ຫົວເວັບ ຈົນເຖິງທ້າຍເວັບ (ຕ້ອງເລື່ອນລົງມາທ້າຍສຸດຂອງເວັບກ່ອນ).

ຫລັງຈາກ ທີ່ຕົບແຕ່ງ ຫລື ໄດ້ຮູບມາຕາມທີ່ຕ້ອງການແລ້ວ ກໍ່ສາມາດກົດ Save ໄຟລ໌ຮູບ ມາໄວ້ໃນຄອມ ຫລື ຈະອັບໂຫລດໄປໄວ້ທີ່ Diigo.com ກໍ່ໄດ້.

ດາວໂຫລດ - https://chrome.google.com/webstore/detail/alelhddbbhepgpmgidjdcjakblofbmce

ບົດຄວາມທີ່ກ່ຽວຂ້ອງເເລະຫນ້າສົນໃຈ

ຫລິ້ນເກມມືປືນຮັບຈ້າງ Contract Killer ເທິງ Google Chrome

Souliyo — Sat, 04 Feb 2012 05:57:58 +0000

Facebook ບໍ່ມີໃຜອອນໄລນ໌, ໃນເວັບທີ່ມັກບໍ່ມີຫຍັງອ່ານ, ຢາກຫລິ້ນເກມ ແຕ່ສະເປັກຄອມບໍ່ແຮງ; ຕ້ອງມານີ້ເລີຍ ມາຫລິ້ນ Contract Killer ເພຶ່ອເປັນມືປືນ. Contract Killer ຖືວ່າເປັນເກມຫນຶ່ງທີ່ໄດ້ຮັບຄວາມນິຍົມຫລາຍໃນ Android ແລະ iOS. ແຕ່ປະຈຸບັນນີ້ໄດ້ອອກເວີຊັ່ນທີ່ສາມາດຫລິ້ນຢູ່ເທິງເວັບບຼາວເຊີໄດ້ແລ້ວ ໂດຍເປັນ Google Chrome. ສຳລັບເກມນີ້ ຈະເປັນການພອດມາຈາກເວີຊັ່ນຂອງ Android ແລະ iOS; ສະນັ້ນທຸກຢ່າງຈະຄືກັນທຸກປະການ.

ສຳລັບເກມນີ້ສາມາດຫລີ້ນໄດ້ແບບ Offline, ແຕ່ໃນການເປີດຫລິ້ນເກມເທຶ່ອທຳອິດອາດຈະດົນຫນ້ອຍຫນຶ່ງ ເພາະຕ້ອງໄດ້ມີການດາວໂຫລດ ເອົາຂໍ້ມູນເກມ ມາເກັບໄວ້ ປະມານ 300MB. ສຳລັບໃຜທີ່ຢາກລອງຫລິ້ນ ກໍ່ສາມາດເຂົ້າໄປດາວໂຫລດໄດ້ຫລ້າໆເລີຍ ຈາກ Chrome Web Store.

ດາວໂຫລດ - https://chrome.google.com/webstore/detail/meklndaflopgghbomkdpofehonfclipi

ບົດຄວາມທີ່ກ່ຽວຂ້ອງເເລະຫນ້າສົນໃຈ

ສ້າງໜັງສັ້ນຂອງຊ່ວງໜຶ່ງໃນຊີວິດ ຈາກ Facebook ດ້ວຍ Timeline Movie Maker

Souliyo — Tue, 31 Jan 2012 07:24:18 +0000

ພໍດີໄດ້ໄປທົດລອງເຮັດມາ ກໍ່ຖືວ່າຫນ້າສົນໃຈຫລາຍ ສຳລັບ Timeline Movie Maker. ໂດຍ Timeline Movie Maker ຈະນຳເອົາ Facebook Timeline ຂອງເຮົາໄປເຮັດເປັນຫນັງສັ້ນ. ສຳລັບຄົນທີ່ໃຊ້ງານ Facebook ມາດົນຫນ້າຈະລອງເຮັດເບິງເນາະ. ສຳລັບ Timeline Movie Maker ເຮັດອອກມາສຳລັບຄວາມບັນເທີງ ຫລື ການເກັບນຳເລື່ອງລາວຂອງເຮົາໃນ Facebook ໄປເຮັດເປັນວິດີໂອສັນໆ ແລະ ຫນ້າສົນໃຈ.

ຢ່າງໃດກໍ່ຕາມ ຫລາຍຄົນອາດຈະຕົກໃຈວ່າ ເປັນແບບນີ້ ຈະບໍ່ຖືກລ້ວງຂໍ້ມູນສ່ວນໂຕຫມົດບໍ່? ຄວາມຈິງຄື ບໍ່, ເພາະມັນຈະສາມາດເກັບກຳໄດ້ພຽງບາງສ່ວນເທົ່ານັ້ນ ແລະ ອີກຢ່າງຈະມີພຽງຫມູ່ໃນລາຍຊື່ຂອງທ່ານເທົ່ານັ້ນທີ່ຈະສາມາດເປີດເບິງໄດ້. ສຳລັບໃຜຢາກລອງເຮັດເບິງກໍ່ສາມາດເຂົ້າໄປທີ່ http://www.timelinemoviemaker.com ໄດ້ເລີຍ.

ບົດຄວາມທີ່ກ່ຽວຂ້ອງເເລະຫນ້າສົນໃຈ

WiGig SD Card, ໂອນຂໍ້ມຸນລະດັບແຜ່ນ DVD ພາຍໃນ 60 ວິນາທີ

Souliyo — Tue, 31 Jan 2012 04:28:11 +0000

ໃນປີ 2010 ທີ່ຜ່ານມາ ໄດ້ມີເທັກໂນໂລຢີ ທີ່ຊື່ວ່າ WiGig ທີ່ເປັນລະບົບເຄຶອຄ່າຍ ຫລື ມາດຕະຖານ Wifi ແບບໃຫມ່ທີ່ສາມາດຖ່າຍໂອນຂໍ້ມູນໄດ້ສູງເຖິງ 7Gbps ເທິງຄື້ນຄວາມຖີ່ 60 GHz. ຫລ້າສຸດທາງ Panasonic ໄດ້ນຳເອົາເທັກໂນໂລຢີນີ້ມາທົດລອງໃຊ້ກັບ SD Card ກັບແທັບເລັດ ເພຶ່ອຈະເຮັດໃຫ້ມັນສາມາດຖ່າຍໂອນຂໍ້ມູນໄດ້ໄວຂຶ້ນ ເທິງເຄຶອຄ່າຍ WiGig. ໂດຍເບື້ອງຕົ້ນ ລະດັບຄວາມໄວຂອງການຖ່າຍໂອນຂໍ້ມູນໃນ WiGig SD Card ນີ້ ແມ່ນສາມາກໂອນວິດີຈາກຫນຶ່ງແຜ່ນ DVD ໄດ້ພາຍໃນເວລາບໍ່ເຖິງ 1ນາທີ, ພາຍໃນໄລຍະຫ່າງລະຫວ່າງ 1-3ແມັດ ເທົ່ານັ້ນ. ຢ່າງໃດກໍ່ຕາມ ໃນລາຍງານບອກວ່າ WiGig SD Card ນີ້ຈະອອກມາໃນຊ່ວງປີຫນ້າ. ຕົວຢ່າງແລະ ລາຍລະອຽດເພີ່ມເຕີມສາມາດເບິງໄດ້ຈາກວິດີໂອ.

ທີ່ມາ – Engadget

ບົດຄວາມທີ່ກ່ຽວຂ້ອງເເລະຫນ້າສົນໃຈ

ແອັບຯສຳລັບພິມພາສາລາວ ເທິງ iPhone ໂດຍບໍ່ຕ້ອງ Jailbreak

Souliyo — Sun, 22 Jan 2012 03:10:39 +0000

ທ່ານທີ່ໃຊ້ iPhone, iPod touch ແລະ iPad ອາດຈະມີປັນຫາທີ່ຢາກພິມພາສາລາວໃນອຸປະກອນຂອງຕົນເອງ, ແຕ່ຕິດຢູ່ທີ່ ຕ້ອງເຮັດການ Jailbreak ແລ້ວຕິດຕັ້ງຄີບອດແບບດັດແປງລົງໄປ ເຊິ່ງສຳລັບຜູ້ໃຊ້ທົ່ວໄປທີ່ບໍມີຄວາມຊຳນານໃນການເຮັດ Jailbreak ກໍ່ອາດຈະລຳບາກ ແລະ ບໍ່ຮູ້ວ່າຈະຕ້ອງເຮັດແນວໃດ. ສະນັ້ນ ບົດຄວາມນີ້ຂໍແນະນຳອີກຫນຶ່ງທາງເລືອກທີ່ງ່າຍ (ແຕ່ບໍ່ງ່າຍເວລາໃຊ້ງານ) ໃນການທີ່ຈະຕິດຕັ້ງແປ້ນພິມພາສາລາວເທິງອຸປະກອນ iDevice ເຊິ່ງເປັນແອັບຯທີ່ຊື່ວ່າ Unicoder. (ສາມາດເຂົ້າໄປ App Store ແລ້ວພິມ Unicoder)

Unicoder ມີທັງເວີຊັ່ນແຈກລ້າ ແລະ ເວີຊັ່ນທີ່ຕ້ອງຊື້, ແນະນຳໃຫ້ທ່ານດາວໂຫລດເວີຊັ່ນແຈກລ້າດີກວ່າ. ຫລັງຈາກດາວໂຫລດແລະຕິດຕັ້ງສຳເລັດຮຽບຮ້ອຍແລ້ວ ກໍ່ໃຫ້ທ່ານເຂົ້າໄປເປີດແອັບຯດັ່ງກ່າວຂຶ້ນມາ ແລ້ວກໍ່ມາປະຕິບັດຕາມ ຫລື ເບິງວິທີການໃຊ້ງານເບື້ອງຕົ້ນ ທາງລຸ່ມນີ້.

ເມຶ່ອເປີດແອັບຯຂຶ້ນມາ ກໍ່ຈະເຫັນຕາມຮູບ(ດ້ານຊ້າຍ) ທາງລຸ່ມນີ້, ໃຫ້ທ່ານພິມຄຳວ່າ lao ລົງໄປໃນຊ່ອງຄົ້ນຫາ ແລ້ວກົດທີ່ປຸ່ມ Search ຕາມທີ່ເຫັນໃນຮູບ(ດ້ານຊ້າຍ), ແລ້ວທ່ານກໍ່ຈະເຫັນໂຕອັກສອນພາສາລາວປາກົດຂຶ້ນມາຕາມຮູບດ້ານຂວາມື.

ເມຶ່ອເຫັນໂຕອັກສອນລາວແລ້ວ ກໍ່ລົງມືພິມສິ່ງທີ່ທ່ານຢາກພິມລົງໄປ (ຫາກຕ້ອງການພິມພາສາອັງກິດປົນ ແນະນຳສະລັບເປັນ Keyboard ແບບປົກກະຕິໄດ້). ໃນນີ້ຜູ້ຂຽນເອງທົດລອງພິມສັ້ນໆ ແລະ ກໍ່ໄດ້ຕາມຮູບທາງດ້ານຊ້າຍມື ດ້ານລຸ່ມນີ້. ເມຶ່ອສຳເລັດແລ້ວ ຢາກນຳໄປໃຊ້ໃນ Facebook ຫລື ແອັບຯອື່ນໆກໍ່ພຽງແຕ່ຈ້ຳໄປທີ່ບ່ອນຫວ່າງໃນຊ່ອງສະແດງໂຕຫນັງສື ແລ້ວກໍ່ຈະເຫັນຕົວເລືອກຂຶ້ນມາ ໃຫ້່ເລືອກເອົາ Select All ເພຶ່ອເລືອກເອົາທຸກຂໍ້ຄວາມທີ່ພິມລົງໄປຕາມຮູບ(ດ້ານຂວາ) ທາງລຸ່ມນີ້.

ຫລັງຈາກກົດ Select All ແລ້ວ ກໍ່ຈະມີຕົວເລືອກຂຶ້ນມາໃຫ້ເລືອກ ຄື Cut, Copy ແລະ Find. ຕາມຮູບ(ດ້ານຊ້າຍ)ທາງລຸ່ມນີ້ ໃຫ້ທ່ານເລືອກກົດ Copy ເພຶ່ອຈະເອົາໄປໃຊ້ງານໃນແອັບອື່ນ. ຫລັງຈາກນັ້ນກໍ່ເຂົ້າໄປແອັບທີ່ທ່ານຕ້ອງການຈະນຳໄປໃຊ້ ໃນນີ້ ຂພຈ ເລືອກໃຊ້ Facebook ກໍ່ພຽງແຕ່ເຂົ້າໄປຊ່ອງຂໍ້ຄວາມອັບເດດ ແລ້ວກໍ່ຈ້ຳໄປທີ່ຫນ້າຈໍຫວ່າງໆ ແລ້ວກໍ່ຈະເຫັນຕົວເລືອກຂຶ້ນມາ, ໃຫ້ກົດ Paste ຕາມຮູບ(ດ້ານຂວາ) ທາງດ້ານລຸ່ມນີ້.

ພຽງເທົ່ານີ້ ທ່ານກໍ່ຈະສາມາດໂພສ ຫລື ສົ່ງຂໍ້ຄວາມຕ່າງໆເປັນພາສາລາວໄດ້ ຕາມຮູບທາງດ້ານລຸ່ມນີ້ ໂດຍບໍ່ຕ້ອງ Jailbreak ແລະບໍ່ຕ້ອງຫຍຸ້ງຍາກ ພຽງເຂົ້າໄປດາວໂຫລດແອັບດັ່ງກ່າວໃນ App Store.

ບົດຄວາມທີ່ກ່ຽວຂ້ອງເເລະຫນ້າສົນໃຈ

ຜ່ອນຄາຍສະຫມອງດ້ວຍເກມງ່າຍໆ Bejeweled ເທິງ ບຼາວເຊີ Chrome

Souliyo — Sat, 21 Jan 2012 06:19:16 +0000

ມາອີກແລ້ວ ມາແນະນຳເກມງ່າຍໆ ສະບາຍໆ ສຳລັບຜ່ອນຄາຍສະຫມອງຄົນໃຊ້ອິນເຕີເນັດ. ເຊິ່ງເກມນີ້ຫາກຈະເອີ້ນຊື່ແບບພາສາບ້ານໆກໍ່ຄື ເກມເພັດ, ແລະ ຊື່ແທ້ໆຂອງມັນກໍ່ຄື Bejeweled. Bejeweled ເປັນເກມຂອງທາງ PopCap ເຊິ່ງກ່ອນຫນ້ານີ້ໄດ້ອອກເວີຊັ່ນ Android ແລະ iOS ໄປ ແລະ ກໍ່ໄດ້ຮັບຄວາມນິຍົມສູງ. ຫລ້າສູດກໍ່ມີເວີຊັ່ນເທິງເວັບອອກມາ ທີ່ໃຊ້ເທັກໂນໂລຢີ HTML 5 ແຕ່ຫນ້າເສຍດາຍ ມັນສາມາດຫລິ້ນໄດ້ເທິງ Chrome ເທົ່ານັ້ນ ສຳລັບບຼາວເຊີໂຕອື່ນຈະບໍ່ສະຖຽນ. ຫາກໃຜທີ່ໃຊ້ງານ Google Chrome ຢູ່ກໍ່ລອງເຂົ້າໄປດາວໂຫລດ ແລະ ຫລິ້ນໄດ້ເລີຍ ແບບບໍ່ເສຍເງິນ (ຫລິ້ນອອນໄລນ໌ເທົ່ານັ້ນ).

ດາວໂຫລດ - https://chrome.google.com/webstore/detail/adpkifcfcacgmnggcbpbjbkdijciiigm

ບົດຄວາມທີ່ກ່ຽວຂ້ອງເເລະຫນ້າສົນໃຈ

iPhone 4S ແລະ iPad 2 ສາມາດ jailbreak ໄດ້ແລ້ວ ດ້ວຍ iOS 5.0.1

Souliyo — Fri, 20 Jan 2012 23:29:49 +0000

ຂ່າວດີຫລ້າສຸດສຳລັບສາວົກ Jailbreak ປະຈຸບັນ iPhone 4S ແລະ iPad 2 ທີ່ໃຊ້ລະບົບປະຕິບັດການ iOS 5.0 ແລະ 5.0.1 ສາມາດ Jailbreak ໄດ້ເປັນທີ່ຮຽບຮ້ອຍແລ້ວ. ເຊິ່ງການ Jailbreak ນີ້ສາມາດເຮັດໄດ້ຜ່ານ ເຄື່ອງມືທີ່ຊື່ວາ Absinthe ແລະ ເປັນກາດ jailbreak ທີ່ສົມບູນ ຫລື ທີ່ເອີ້ນວ່າ Untethered. ຢ່າງໃດກໍ່ຕາມ ~~ໃນຂ່າວດີກໍ່ຍັງມີຂ່າວຮ້າຍນຳມາປະກົບຄື Absinthe ຈະມີສະເພາະເຄື່ອງ Mac ເທົ່ານັ້ນ~~.

ສຳລັບວິທີການ Jailbreak ແມ່ນສາມາດເຮັດໄດ້ງ່າຍຫລາຍ, ເຊິ່ງຫາກໃຜທີ່ໃຊ້ iPad 2 ຫລື iPhone 4S ກໍ່ສາມາດເບິງວິດີໂອການເຮັດ Jailbreak ໄດ້ທາງລຸ່ມນີ້

ອັບເດດ: ປະຈຸບັນມີເວີຊັ່ນ Windows ອອກມາໃຫ້ແລ້ວ ສາມາດດາວໂຫລດໄດ້ທີ່ http://cache.greenpois0n.com/dl/absinthe-win-0.2.zip

ທີ່ມາ – Redmondpie

ບົດຄວາມທີ່ກ່ຽວຂ້ອງເເລະຫນ້າສົນໃຈ

Apple ປະກາດເປີດໂຕ iBooks 2, iTunes U ແລະ iBooks Author ສຳລັບຕະຫລາດການສຶກສາ

Souliyo — Fri, 20 Jan 2012 05:32:56 +0000

ຫລ້າສຸດ Apple ໄດ້ເປີດໂຕເຄື່ອງມື ແລະ ອຸປະກອນສຳລັບການສຶກສາ, ເຊິ່ງໃນນັ້ນກໍ່ມີ iBooks 2, iTunes U ແລະ iBooks Author. ເຊິ່ງໃນນີ້ສະແດງໃຫ້ເຫັນວ່າ Apple ກຳລັງກ້າວເຂົ້າຕະຫລາດການສຶກສາຢ່າງເຕັມໂຕ ໂດຍມີ iPad ເປັນອຸປະກອນຫລັກ ສຳລັບການຂັບເຄື່ອນຕະຫລາດນີ້. ມາເບິງກັນວ່າມີຫຍັງດີໆໃນ iBooks 2, iTunes U ແລະ iBooks Author.

ກ່ອນອື່ນຂໍເລີ່ມທີ່ iBooks 2, ສຳລັບ iBooks 2 ນີ້ເປັນເວີຊັ່ນໃຫມ່ ຫລື iBooks ຍຸກໃຫມ່ເລີ່ຍກໍ່ວ່າໄດ້. ເຊິ່ງໃນ iBooks 2 ນີ້ຈະຮອງຮັບການສະແດງຜົນ eBook ໄດ້ເຕັມຮູບແບບ ແລະ ທັນສະໄຫມຂຶ້ນ ຢ່າງເຊັ່ນ: ສາມາດສະແດງຜົນວິດີໂອໃນ eBook, ຮູບພາບສາມມິຕິ, ຄັງຮູບ ແລະ ການເຄື່ອນໄຫວຕ່າງໆ. ຜູ້ໃຊ້ຈະສາມາດອ່ານພ້ອມປຶ້ມໄປພ້ອມກັບການຕອບໂຕ້ຈາກ ປຶ້ມ ຫລື eBook ນັ້ນໆ, ເຊິ່ງເປັນການເຮັດໃຫ້ນັກຮຽນ - ນັກສຶກສາ ມີຄວາມກະຕືລືລົ້ນ ແລະ ສົນໃຈໃນການຮຽນການສອນຫລາຍຂຶ້ນ. ນອກນັ້ນແລ້ວ ໃນ eBooks 2 ຍັງມາກັບຄວາມສາມາດ Highlight ແບບໃຫມ່ ທີ່ໃຊ້ງານງ່າຍຂຶ້ນ ພ້ອມທັງມີຫລາຍສີໃຫ້ເລືອກໃນການ Highlight ຫນັງສື ແລະ ຍັງມີການແຍກສ່ວນ Highlight ອອກມາເປັນສ່ວນຫນຶ່ງໄວ້ໃຫ້ດ້ວຍ, ພ້ອມດຽວກັນນັ້ນ ຍັງສາມາດຈັດເກັບເປັນ Note Card ສຳລັບໄວ້ອ່ານລື້ມຄືນ ສິ່ງທີ່ເຮົາໄດ້ຫມາຍໄວ້ໄດ້ອີກດ້ວຍ. ສຳລັບ iBooks 2 ເປີດໃຫ້ດາວໂຫລດແລ້ວ. ຟຼີ!

ຕໍ່ມາກໍຄື iBooks Author. ເມຶ່ອມີປຶ້ມ ແລະ ເຄື່ອງມືສຳລັບອ່ານປຶ້ມແບບທັນສະໄຫມແລ້ວ ທາງ Apple ຍັງເຮັດໃຫ້ນັກຂຽນທັງອິດສະລະ ຫລື ອົງກອນບໍລິສັດ ສາມາດສ້າງປຶ້ມທີ່ທັນສະໄຫມ ແລະ ຕອບສະຫນອງ iBooks 2 ອີກດ້ວຍ, ເຊິ່ງມັນກໍ່ຄື iBooks Author. ສຳລັບ iBooks Author ນັ້ນຈະເປັນເຄື່ອງມືທີ່ໃຊ້ງານງ່າຍ, ແລະ ສະດວກ ເຊິ່ງນັກຂຽນສາມາດສ້າງປຶ້ມຫນຶ່ງເຫລັ້ມໄດ້ງ່າຍໆ ພ້ອມກັບການໃສ່ຟັງຊັ່ນຕ່າງໆໄດ້. ສິ່ງທີ່ຫນ້າສົນໃຈໃນ iBooks Author ກໍ່ຄື ນັກຂຽນສາມາດຶງໄຟລ໌ Word ເຂົ້າໄປໄດ້ທັນທີ ແລ້ວໂປຼແກຼມຈະຈັດການໃຫ້ທັນທີ ໂດຍການປຽບທຽບຈາກການຈັດຫນ້າໃນໄຟລ໌ Word ນັ້ນໆ. ນອກນັ້ນແລ້ວ ໃນການອອກແບບປຶ້ມຜ່ານ iBooks Author ຈະເປັນການອອກແບບໃນໂຫມດຂອງ Landscape ຫລື ລວງນອນ ແຕ່ສຳລັບແນວຕັ້ງ ທາງໂປຼແກຼມໄດ້ມີການຈັດການໃຫ້ໂດຍອັດຕະໂນມັດ ແລະ ມີຄອນເທັ້ນຕ່າງໆຄົບຖ້ວນແບບທີ່ ລວງນອນມີ. ສຳລັບເຄື່ອງມືນີ້ ທາງ Apple ປ່ອຍອອກມາໃຫ້ດາວໂຫລດຟຼີ ແຕ່ຫນ້າເສຍດາຍ ມີສະເພາະສຳລັບເຄື່ອງ Mac ເທົ່ານັ້ນ. ສຳລັບຜູ້ໃຊ້ Windows ກໍ່ອົດໃຊ້ງານກັນຕໍ່ໄປ.

iTunes U. ໃຜໆອາດຈະຄຸ້ນຫູກັນກັບ iTunes U ຫ້ອງຮຽນອອນໄລນ໌ທີ່ອິດສະຫລະ ທີ່ມີວິດີໂອ ແລະ ຄິບສຽງ ສື່ການຮຽນການສອນ ຈາກມະຫາວິທະຍາໄລ ຊື່ດັງຕ່າງໆ, ໂດຍປະຈຸບັນ iTunes U ມີຍອດດາວໂຫລດຄອນເທັ້ນໄປແລ້ວທັງຫມົດ 700 ກວ່າລ້ານເທຶ່ອແລ້ວ (ໃຜທີ່ຢາກລອງສຶກສາຄອສຕ່າງປະເທດ ກໍ່ສາມາດເຂົ້າໄປດາວໂຫລດມາລອງຮຽນເບິງເນາະ ອາລົມ ດຽວກັບທີ່ນັ່ງຮຽນໃນຫ້ອງຮຽນຕ່າງປະເທດເລີຍ ແລະ ຍັງຟຼີອີກດ້ວຍ). ໃນນີ້ iTunes U ໄດ້ມີການອັບເດດໃຫ້ທັນສະໄຫມຂຶ້ນ, ເຊິ່ງສາມາດນຳໄປເຊື່ອມຕໍກັບການຮຽນການສອນໃນຫ້ອງຮຽນໂຕຈິງ, ເຊິ່ງອາຈານຜູ້ສອນສາມາດສົ່ງວຽກບ້ານ ຫລື ລາຍຊື່ປຶ້ມໃນການຮຽນການສອນໄດ້ທັນທີ, ເຊິ່ງນັກຮຽນນັກສຶກສາ ສາມາດກວດເບິງວ່າມີຫຍັງທີ່ຫ້ອງຮຽນຂອງໂຕເອງຕ້ອງການ ແລະ ສາມາດສັ່ງຊື້ປຶ້ມໄດ້ທັນທີ ຜ່ານ iBooks Store ລວມເຖິງ Apps ທີ່ກ່ຽວຂ້ອງກັບຫ້ອງຮຽນໄດ້ອີກດ້ວຍ. ນອກນັ້ນແລ້ວ ໃນສ່ວນຂອງນັກຮຽນ – ນັກສຶກສາ ຍັງມີສ່ວນທີ່ເປັນບ່ອນຈັດການວຽກບ້ານຕ່າງໆໃຫ້ອີກດ້ວຍ ພ້ອມກັບຄວາມສາມາດຂອງ iBooks ມາປະສົມປະສານ.

ຢ່າງໃດກໍ່ດີ, ສາມຢ່າງທີ່ທາງ Apple ຫາກໍ່ເປີດໂຕໄປນີ້ ຫນ້າສົນໃຈກັບຕະຫລາດການສຶກສາຂອງອາເມລິກາຫລາຍ ກໍ່ຕ້ອງເບິງຕໍ່ໄປວ່າ ໃນອານາຄົດຈະໄດ້ຮັບຜົນຕອບຮັບດີຫລືບໍ່. ສຳລັບຜູ້ຂຽນເອງແລ້ວ ຫາກມີໂອກາດກໍ່ຢາກລອງປະສົບການນີ້ເບິງ. ແຕ່ເທົ່າທີ່ເປັນໄປໄດ້ ກໍ່ມີແຕ່ຮຽນຮູ້ເອງຜ່ານ iTunes U ແລະ ກໍ່ຢາກແນະນຳໃຫ້ທ່ານຜູ້ອ່ານທີ່ສົນໃຈຢາກໄປຮຽນຕໍ່ຕ່າງປະເທດ ສາມາດລອງຮຽນຈາກ iTunes U ໄດ້.

ຂໍ້ມູນເພີ່ມເຕີມ – Apple.com/education

ບົດຄວາມທີ່ກ່ຽວຂ້ອງເເລະຫນ້າສົນໃຈ

Motorola Xoom ໄດ້ອັບເດດເປັນ Android 4.0 ICS ຢ່າງເປັນທາງການແລ້ວ

Souliyo — Thu, 19 Jan 2012 10:00:07 +0000

ລາຍງານຫລ້າສຸດ ທາງ Motorola ໄດ້ນຳຂ່າວດີມາໃຫ້ຜູ້ໃຊ້ແທັບເລັດຂອງຕົນເອງ, ໂດຍການປ່ອຍຊຸດອັບເກຼດ Android 4.0.3 Ice Cream Sandwich ໃຫ້ກັບ Motorola Xoom ເປັນທີ່ຮຽບຮ້ອຍແລ້ວ. ໂດຍການປະຈຸບັນລຸ້ນທີ່ໄດ້ຮັບການອັບເກຼດແບບ OTA ຍັງເປັນພຽງລຸ້ນ WIFI ໃນອາເມລິກາເທົ່ານັ້ນ. ສຳລັບປະເທດອື່ນໆ ຫລື ເຄື່ອງໂຊນອື່ນ ລວມເຖິງລຸ້ນ 3G ຫນ້າຈະຕາມຫລັງມາໄວໆນີ້. ສຳລັບໃຜທີ່ໃຊ້ຢູ່ ກໍ່ລອງເຂົ້າໄປກວດກາການອັບເດດເບິງ ບາງທີອາດຈະໄດ້ຮັບການແຈ້ງເຕືອນໃຫ້ອັບເດດກໍ່ໄດ້.

ທີ່ມາ - Android Central

ບົດຄວາມທີ່ກ່ຽວຂ້ອງເເລະຫນ້າສົນໃຈ

Wikipedia ອອກແອັບຯສຳລັບ Android ຢ່າງເປັນທາງການແລ້ວ

Souliyo — Thu, 19 Jan 2012 09:52:09 +0000

ຫລ້າສຸດທາງເວັບໄຊຕ໌ Wikipedia ເວັບສາລານຸກົມອັນດັບຫນຶ່ງຂອງໂລກ ກໍ່ໄດ້ອອກແອັບຯສຳລັບອຸປະກອນ Android ຢ່າງເປັນທາງການແລ້ວ. ຫລັງຈາກທີ່ກ່ອນຫນ້ານີ້ປ່ອຍໃຫ້ຜູ້ໃຊ້ຕ້ອງອົດທົນໃຊ້ງານ ແອັບຯຈາກພັດທະນາລາຍອື່ນມາດົນ. ໃນເວີຊັ່ນທຳອິດຂອງ Wikipedia For Android ນີ້ກໍ່ມີຄວາມສາມາດທີຫນ້າສົນໃຈຫລາຍ ເຊິ່ງໄດ້ແກ່:

ຈັດເກັບບົດຄວາມໄວ້ອ່ານຕາມຫລັງ (ແບບອອຟໄລນ໌).
ຄົ້ນຫາບົດຄວາມ ຕາມສະຖານທີ່ ທີ່ຢູ່ໃກ້.
ແບ່ງປັນບົດຄວາມໄດ້ ດ້ວຍຄວາມສາມາດ Share ທີ່ມາໃນ Android.
ສາມາດອ່ານບົດຄວາມໄດ້ໃນຫລາຍພາສາ.
ການສະແດງ ແລະ ການຄົ້ນຫາແບບເຕັມຫນ້າຈໍ.

ເຫັນຄວາມສາມາດແລ້ວ ກໍ່ເປັນຕາໂຫລດມາເກັບໄວ້ໃນເຄື່ອງ ສຳລັບນັກສຶກສາ ຫລື ນັກຫາຄວາມຮູ້ຮອບໂຕ ຕ້ອງບໍ່ພາດ. ສາມາດດາວໂຫລດໄດ້ຫລ້າໆທີ່ https://market.android.com/details?id=org.wikipedia

ທີ່ມາ – Android Market