ຍອດຜູ້ໃຊ້ Windows 7 ຫລາຍແຊງຫນ້າ Vista ແລ້ວ
ລາຍງານຂ່າວລ່າສຸດ ພາຍໃນລະຍະເວລາບໍ່ເຖິງປີ ຍອດຜູ້ໃຊ້ Windows 7 ທົ່ວໂລກ ແຊງໜ້າ Vista ໄປຮຽບຮ້ອຍແລ້ວ ຢ່າງໃດກໍຕາມ ຍອດລວມຂອງການໃຊ້ Windows ທັງສອງເວີລ໌ຊັນຍັງພ່າຍແພ້ໃຫ້ກັບ Windows XP ທີ່ຄອງໃຈຜູ້ໃຊ້ມາຍາວນານ
Windows Vista ວາງຕະຫລາດໃນປີ 2007 ແຕ່ເບິ່ງຄືກັບວ່າມັນຈະບໍ່ໄດ້ຮັບຄວາມນິຍົມເທົ່າທີ່ຄວນ ອີກທັງມີລາຍງານຂ່າວການພົບຂໍ້ບົກຜ່ອງຂອງການເຮັດວຽກງານຕະຫລອດຈົນປະສິດທິພາບ ແລະສະຖຽນພາບການເຮັດວຽກງານທີ່ບໍ່ຄ່ອຍເປັນທີ່ໜ້າພໍໃຈນັກຂອງຜູ້ໃຊ້ ໂດຍສະເພາະຄວາມບໍ່ເຂົ້າກັນຂອງແອບພິເຄຊັນ ຕະຫລອດຈົນຄວາມຕ້ອງການຂອງຮາລ໌ດແວລ໌ ແລະບັນຫາການໃຊ້ງານລະບົບຮັກສາຄວາມປອດໄພຂອງບັນຊີຜູ້ໃຊ້ (UAC) ຊຶ່ງທັງໝົດທັງມວນເຮັດໃຫ້ Vista ບໍ່ແຮງຕາມທີ່ຄາດ
ຈົນກະທັ່ງ Windows 7 ລະບົບປະຕິບັດການທີ່ເປັນຄວາມຫວັງຂອງທັງໄມໂຄຊອຟົທ໌ແລະຜູ້ບໍລິໂພກກໍເຜີຍໂສມອອກມາ ເມື່ອເດືອນກັນຍາປີ 2009 (ຫລັງຈາກ Vista ວາງຕະຫລາດໄດ້ພຽງແຕ່ 2 ປີ) ປາກົດວ່າ ມັນສອບຜ່ານທັງໃນແງ່ຂອງປະສິດທິພາບ ແລະສະຖຽນລະພາບການເຮັດວຽກຈົນໄດ້ຮັບຄວາມນິຍົມຢ່າງວ່ອງໄວ ສະຖິຕິຍອດຂາຍທີ່ເຄີຍເປັນຂ່າວກໍຄືຫລາຍກວ່າ 7 ກ່ອງຕໍ່ວິນາທີ ລ່າສຸດ NetApplications ລາຍງານວ່າ ຍອດຜູ້ໃຊ້ Windows ທົ່ວໂລກ 90.67% ຂອງຕະຫລາດ OS ແບ່ງເປັນ Windows XP ຫລາຍເຖິງ 61.87% ຕາມດ້ວຍ Windows 7 ທີ່ຂຶ້ນມາເປັນອັນດັບສອງ 14.46% ແລະ Vista ທິ້ມທ້າຍທີ່ 14.34% (ໃນສະຫະລັດ Vista ຍັງເປັນອັນດັບສອງດ້ວຍ % ທີ່ຖິ້ມຫ່າງ Windows 7 ພໍສົມຄວນ) ຢ່າງໃດກໍຕາມ ຍອດການໃຊ້ລະບົບປະຕິບັດການ Windows ໂດຍລວມຕົກລົງຈາກເດືອນກໍລະກົດທີ່ 92% ຄາດວ່າເປັນຜົນມາຈາກຍອດຂາຍ Apple Mac ທີ່ເພີ່ມຂຶ້ນເລັກນ້ອຍ
ຂໍ້ມູນຈາກ: digitaltrends, arip